परिषद्को परिचय
नेपाल कानून व्यवसायी परिषद् एक अविच्छिन्न उत्तराधिकारवाला स्वशासित एवम् संगठित संस्था हो । कानून व्यवसायीहरूको हक हितको संरक्षण गरी समाजप्रति बढी जिम्मेवारीपूर्ण सेवा सञ्चालन गर्न र व्यवस्था गर्न बनेको नेपाल कानून व्यवसायी परिषद् ऐन, २०५० अन्र्तगत यो परिषद्को स्थापना भएको हो । २०५०।८।७ मा प्रारम्भ भएको उक्त ऐनको दफा १ र ४ सोही मितिदेखि नै र बाँकी अन्य दफाहरू २०५१।४।२७ देखि लागू भएको हो । परिषद्को स्थापना हुनु अघि तत्काल लागू रहेको कानून व्यवसायी ऐन, २०२५ बमोजिम कानून व्यवसायीहरूको प्रमाणपत्र दिने, दर्ता अभिलेख राख्ने र व्यवसायिक अनुशासनमा नरहेका कानून व्यवसायीलाई कारबाई र सजाय गर्ने कार्य सर्वोच्च अदालतबाट हुदै आएको थियो । परिषद् स्थापना भएपछि कानून व्यवसायमा प्रवेश गर्नेहरूको परीक्षा लिने, कानून व्यवसायीमा नाम दर्ता गर्ने, व्यावसायिक आचार संहिता निर्धारण गर्ने, तोकिएको व्यवसायिक आचार संहिता अनुरूप कानून व्यवसायीले काम गरे नगरेको सम्बन्धमा अनुगमन गर्ने, व्यवसायिक आचरण विरूद्ध गरेको कार्यसम्बन्धी उजूरी लिने र अनुशासनमा कारबाई र सजाय गर्ने, व्यवसायमा संलग्न कानून व्यवसायीहरूको अभिलेख अद्यावधिक राख्ने, व्यवसायलाई गरिमायम बनाउन आवश्यक प्रशिक्षण तथा तालिमको व्यवस्था गर्ने, कानून व्यवसायीको इज्जत, प्रतिष्ठा, सुरक्षा, हकहित तथा सुविधाको संरक्षण गर्ने, कानून व्यवसायीको हित अभिवृद्धि गर्न अध्ययन, छलफल, सभा, गोष्ठी, प्रवचन आदिको व्यवस्था गर्ने र आवश्यक प्रकाशनको व्यवस्था गर्ने तथा स्तरीय कानूनी शिक्षालाई प्रोत्साहन दिन कानून व्यवसायको लागि उपयुक्त शैक्षिक मापदण्ड सिफारिश गर्ने कार्य परिषद्ले गर्दछ । तर वरिष्ठ अधिवक्ताको उपाधिका हकमा कुनै अधिवक्ताले कम्तीमा १५ वर्ष सर्वाेच्च अदालत वा पुनरावेदन तहको अदालतमा कानून व्यवसाय गरी पेशाको उच्च मर्यादा राखी अदालत र समाजलाई सहयोग गरेको भन्ने सर्वोच्च अदालतलाई लागेमा त्यस्तो अधिवक्तालाई सर्वोच्च अदालतले सम्मानस्वरूप वरिष्ठ अधिवक्ताको उपाधि प्रदान गर्न सक्ने र त्यस्तो वरिष्ठ अधिवक्ताले पनि तोकिए बमोजिमको आचरण पालन गर्नुपर्ने कानूनी व्यवस्था रहेको छ र वरिष्ठ अधिवक्ताको दर्ता एवम् अद्यावधिक अभिलेख राख्ने र आचार संहिता निर्धारण एवम् अनुगमन तथा अनुशासनको कारबाई परिषद्बाटै हुन्छ । परिषद्ले नेपाल कानून व्यवसायी परिषद् ऐन, २०५० अन्तर्गत कानून व्यवसायीको आचार संहिता, २०५१ आन्तरिक कार्य व्यवस्था सञ्चालन नियमावली, २०५५ पाठ्यक्रम तथा परीक्षा सञ्चालन नियमावली, २०५५, कानून व्यवसायी परीक्षा सञ्चालन निर्देशिका, २०५५, लेखापढी व्यवसायीसम्बन्धी नियमावली, २०५१, कर्मचारीको नियुक्ति र सेवासम्बन्धी नियमावली, २०५५, आर्थिक प्रशासन नियमावली, २०५५, अनुशासन समिति (कार्यव्यवस्था) नियमावली, २०५८ बनाई उल्लिखित ऐन, नियम र निर्देशिका एवम् समय समयमा परिषद्को बैठकबाट भएको निर्णयको आधारमा परिषद्ले आफ्नो कार्य सञ्चालन गर्दै आइरहेको छ ।


परिषद्को गठन विधि
परिषद्को उद्देश्य परिपूर्तिको लागि गठन भएको नेपाल कानून व्यवसायी परिषद्मा ११ जना पार्षद्हरू हुन्छन् । जसमा नेपाल अधिराज्यका महान्यायाधिवक्ता – पदेन अध्यक्ष, नेपाल बार एशोसिएशनको अध्यक्ष – पदेन उपाध्यक्ष, सर्वोच्च अदालतको रजिष्ट्रार र त्रिभुवन विश्वविद्यालय कानून संकायका डीन – पदेन पार्षद् रहने व्यवस्था छ र नेपाल अधिराज्यका ५ विकास क्षेत्रबाट ५ वर्षे कार्यावधिको लागि सोही क्षेत्रमा कार्यरत वरिष्ठ अधिवक्ता र अधिवक्ताहरूको निर्वाचन मण्डलद्वारा १/१ जना पार्षद् निर्वाचित भएर आउछन् भने नेपाल बार एशोसिएशनबाट २ जना पार्षद् २ वर्षे कार्यावधिका लागि मनोनित भएर आउछन् । निर्वाचित र मनोनित हुने पार्षद् कम्तिमा १० वर्ष कानून व्यवसायको काम गरिसकेको व्यवसायिक अनुभव प्राप्त वरिष्ठ अधिवक्ता वा अधिवक्ता हुनुपर्ने अनिवार्यता छ ।


परिषद्को कार्यालयको प्रशासकीय प्रमुखको रूपमा एकजना सचिव रहने र सो पदमा परिषद्ले कम्तीमा कानून स्नातक भएको व्यक्तिलाई नियुक्ति गर्न वा परिषद्को अनुरोधमा नेपाल सरकारले राजपत्रांकित कर्मचारीलाई सचिवको रूपमा कार्य गर्ने गरी खटाउने कानूनी व्यवस्था अनुसार हाल नेपाल सरकारद्वारा खटाइएका राजपत्रांकित द्वितीय श्रेणीका सचिव कार्यरत रहदै आएको छ र सोको अतिरिक्त परिषद्द्वारा एक प्रशासकीय अधिकृत लगायत आवश्यक संख्यामा कर्मचारीहरूको व्यवस्था रहेको छ ।




परिषद्को कार्यक्षेत्र
कानून व्यवसायीहरूको हक हितको संरक्षण गरी समाजप्रति बढी जिम्मेवारीपूर्ण सेवा सञ्चालन गर्न र व्यवस्था गर्न स्थापना भएको यस परिषद्को कार्यक्षेत्रलाई निम्न बमोजिम विभाजन गर्न सकिन्छ –
(क) कानून व्यवसायमा प्रवेश गर्नेहरूको परीक्षा लिने,
(ख) कानून व्यवसायीमा नाम दर्ता गर्ने र व्यवसायमा संलग्न कानून व्यवसायीहरूको अभिलेख अद्यावधिक राख्ने,
(ग) व्यावसायिक आचार संहिता निर्धारण गर्ने,
(घ) तोकिएको व्यवसायिक आचार संहिता अनुरूप कानून व्यवसायीले काम गरे नगरेको सम्बन्धमा अनुगमन गर्ने,
(ङ) व्यवसायिक आचरण विरूद्ध गरेको कार्यसम्बन्धी उजूरी लिने र अनुशासनमा कारबाई र सजाय गर्ने,
(च) कानून व्यवसायीको इज्जत, प्रतिष्ठा, सुरक्षा, हकहित तथा सुविधाको संरक्षण गर्ने र व्यवसायलाई गरिमामय बनाउन आवश्यक प्रशिक्षण तथा तालिमको व्यवस्था गर्ने,
(छ) स्तरीय कानूनी शिक्षालाई प्रोत्साहन दिन कानून व्यवसायको लागि उपयुक्त शैक्षिक मापदण्डको सिफरिश गर्ने,
(ज) नेपाल कानूनहरूको वार्षिक सर्वेक्षण तथा कानून व्यवसायीहरूको दर्ता एवम् अद्यावधिक लगत एवम् परिषद्को गतिविधिहरूको सार्वजनिक जानकारीका लागि आवश्यक प्रकाशनको व्यवस्था गर्ने ।
Nepal Bar Council Building
सूचना :
  • लेखक/प्रकाशकहरूलाई अनुरोध


    उपर्युक्त विषयमा वर्ष भरी कानून र न्यायको विषयमा लेखिएका शोधमूलक पुस्तकहरु मध्ये मूल्याङ्कनबाट उत्कृष्ठ ठहरिएको पुस्तकलाई पुरस्कृत गर्ने परिषद्को नीति अनुरुप आ.व. २०७४ साउन देखि २०७५ आषाढ महिना भित्र प्रकाशित भएका पुस्तकहरु मूल्याङ्कनको लागि मिति २०७५ साउन ०८ गते भित्र परिषद् मा पठाई सहयोग गरिदिनु हुन सम्पूर्ण लेखक/प्रकाशकहरुलाई हार्दिक अनुरोध गरिन्छ ।



    (रामहरि शर्मा काफ्ले)
    सचिव
     
  • नेपाल कानून व्यवसायी परिषद्
    २०७५ सालमा सञ्चालन हुने अधिवक्ता तहको
    २५ औं (विशेष) लिखित परीक्षा सम्बन्धी सूचना

    यस परिषद्द्वारा २०७५ सालमा सञ्चालन हुने अधिवक्ता तहको २५ औं (विशेष) परीक्षा दिने परीक्षार्थीहरुले निम्न कार्यक्रमअनुसार काठमाडौं उपत्यकामा मात्र परीक्षा सञ्चालन हुने भएकोले कानून बमोजिम परीक्षा दिन योग्यता पुगेका व्यक्तिहरुले २०७५ साउन १ गते देखि ३० दिन भित्र दरखास्त फाराम बुझाउन आव्हान गरिएको छ । साथै म्याद समाप्त भएको मितिबाट सात दिनसम्म दोब्बर शुल्क तिरी दरखास्त फाराम बुझाउन यो सूचना प्रकाशित गरिएको छ ।
    मिति विषय
    २०७५।०६।०५ संवैधानिक, प्रशासनिक तथा अन्तर्राष्ट्रिय कानून
    २०७५।०६।०६ फौजदारी, देवानी तथा वाणिज्य कानून
    २०७५।०६।०७ प्रमाण कानून र कार्यविधि कानून
    २०७५।०६।०८ कानून व्यवसायी परिषद्, कानून व्यवसायीको आचार
    संहिता एवं मिसिल अध्ययन र अभ्यास
    – दरखास्त फाराम र नजीर सहितको पाठ्यक्रम पुस्तिका रू. २००।– बुझाई परिषद्बाट खरिद गर्न सकिने छ ।
    – परीक्षा दस्तुर वापत रू. २,५००।– को रा.वा.बैंक थापाथली शाखाको च.हि.नं. १४३०००११३५०१ वा बैंक अफ काठमाडौंको च.हि.नं.
    ०१०००००२६१३३५२४ मा जम्मा गरेको सक्कल भौचर पेश गर्नु पर्नेछ ।
    – विशेष सुविधा पाउने परीक्षार्थीहरूको हकमा सुविधा लिन सोस“ग सम्बन्धित प्रमाणित कागजातहरू समावेश गरी फाराम भर्नुपर्ने छ ।
    – परीक्षा सञ्चालन हुने समय र परीक्षा केन्द्र पछि प्रकाशित गरिने छ ।

    (रामहरि शर्मा काफ्ले)
    सचिव
     
  • नेपाल कानून व्यवसायी परिषद्
    कुपण्डोल, ललितपुर
    सूची दर्ता गर्ने बारे
    प्रकाशित मिति २०७५/०३/२१

    यस परिषद्को लागि आ.व. २०७५।०७६ को लागि आवश्यक पर्ने देहायका मालसमान, विविध सेवा र मर्मत सम्भार गराउने प्रयोजनको लागि मौजुदा सूची अद्यावधिक गर्नका लागि इच्छुक फर्म तथा कम्पनीहरुबाट तोकिएको शर्तहरुको अधिनमा रहि यो सूचना प्रकाशित मितिले १५ दिन भित्र परिषद्को कार्यालयमा दर्ताको लागि निवेदन पेश गर्नुहुन यो सूचना प्रकाशित गरिएको छ ।
    सेवा तथा सामानको विवरणः
    १. मसलन्द (कार्यालय प्रयोजनका लागि), २. छपाई (परिषद्को बार्षिक बुलेटिन तथा ल जर्नल एवम् कानून व्यवसायी सम्बन्धी तोकिएका कागजातहरु), ३. कम्प्युटर—प्रिन्टर/फोटोकपी मेसिन/फयाक्स, ४. टोनर रिफिलिङ, ५. मर्मत सम्भार— अफिस फर्निचर/कम्प्युटर—प्रिन्टर/फोटोकपी मेसिन /पंखा/हिटर, ६. सेवा सम्बन्धी –इन्टरनेट / कम्प्युटर सफ्टवेयर/टेलिफोन
    – इच्छुक फर्म, कम्पनीले आपूर्ति गर्न चाहेको मालसमान वा सेवा, मर्मत सम्भारको विवरण उल्लेख गरिएको प्रस्ताव तोकिएको मितिभित्र निवेदन दस्तुर सहित परिषद्को कार्यालयमा पेश गर्नु पर्नेछ ।
    – इच्छुक फर्म, कम्पनीले प्रस्तावसाथ अद्यावधिक फर्म रजिष्ट्रेशन, आयकर दर्ता तथा मूल्य अभिवृद्धिकर दर्ताको प्रमाणपत्रको प्रतिलिपि सहित आ.व. २०७४/०७५ को कर चुक्ता प्रमाण पेश गर्नुपर्ने छ ।
    – अन्य केही कुरा बुझ्नु परेमा कार्यालय समयमा यस परिषद्को लेखा तथा स्टोर शाखामा सम्पर्क राख्न सकिने छ ।

    सचिव
    नेपाल कानून व्यवसायी परिषद्